Published on 2079-04-29

काठमाडौं – पूर्व प्रधानमन्त्री के.पी शर्मा ओलीको श्रीमती राधिका शाक्य ज्यूले मानवसेवा आश्रममा जन्मदिन मनाउनुभएको छ । मानवसेवा आश्रमको संरक्षक समेत रहनुभएको शाक्यले नागार्जुन नगरपालिकामा रहेको आश्रमको शाखामा आइतबार बेलुका जन्मदिन मनाउनुभएको हो ।

शाक्यले जन्मदिनको अवसरमा मानवसेवा आश्रमको संरक्षणमा रहनुभएका लक्ष्मीनारायण र बालगोपालहरुलाई भोजन गराउनका लागि रु. ५२ हजार योगदान गर्नुभयो ।

उक्त कार्यक्रम पूर्व प्रधानमन्त्री के.पी शर्मा ओलीज्यूको विशेष उपस्थितिमा भएको थियो । उहाँले आश्रममा आश्रितहरुलाई आफ्नै हातले भोजन गराउँदै रमाउनुभयो ।

कार्यक्रममा बूढानिलकण्ठ नगरपालिकाका उप प्रमुख अनिता लामाज्यू, नागार्जुन नगरपालिकाका प्रमुख प्रशासकीय अधिकृत ईश्वरी प्रसाद ढकालज्यू, मानवसेवा आश्रमका अभिभावक एवम् बागमती प्रदेश लोकसेवा आयोगका अध्यक्ष माननीय सुरेशमान श्रेष्ठज्यू, नागार्जुन नगरपालिकाका प्रशासन विभाग प्रमुख नारायण तिमल्सिनाज्यू लगायत मानवसेवा आश्रमलाई प्रेम गर्नुहुने सहयोगी शुभेच्छुक महानुभावहरुको उपस्थिति रहेको थियो ।

मानवसेवा आश्रमले सडकपेटी र सार्वजनिक स्थलहरुमा रहेका सहयोगापेक्षी (बेसहारा, अशक्त, असहाय, अनाथ, अभिभावकविहीन, मानसिक तथा शारीरिक रुपमा कमजोर) सडकआश्रित मानवहरुको उद्धार, उपचार, पारिवारिक पुनर्मिलन एवं पुनर्मिलन हुन नसकेकाहरुको लालनपालन र संरक्षण गर्दै आइरहेको छ । आजको दिनसम्म आइपुग्दा करिब ७५०० जनाको उद्धार गरिसकेको छ भने आजको दिनमा सातै प्रदेशको १९ जिल्लाको २३ वटा सेवा केन्द्रमा गरि करिब १५०० जना विभिन्न उमेर समूहका व्यक्तिहरु संरक्षित हुनुहुन्छ ।